ILAY DOMOINA

( filazalazana nataon’ny renin' i Ny Eja
mitantara ny andro nahaterahany
ary narindrany ho kanto izany )

 

 

tsaroako tsara, ilay andro izay

niandrasanay anao,

ilay vahiny kely

ho tonga ato aminay

fa efa tsindrin-daona ery ny mpianakavy

maika ny hihaona, rahoviana ianao no ho avy ?

fa nony vao maraina, iny niala avy any

domoina kely izay, nisidina ambany

dia niditra ato an-trano

ka nihoraka ny ankizy, « avia ange tazano »

 

ny nahagaga anay

indrindra tamin’izay

dia ity fahasahiany

misangy anay sy dada

ho toy ny olo-tiany

sy fantany ela be

ka ireo zokinao, finaritra ery

fa tiany koa ange !

 

fa afaka roa andro

teo ho eo angaha

tsy hita ilay domoina

domoina sahisahy

satria io andro io,

no tonga teto an-tany

ilay zanako malala

i Solonomenjanahary.

 

fa ny fahagagana, tsy mbola vvoavaliko

sy mbola misitery, eny hatramin’izao

dia io domoina io, indrindra sombinaiko

namaritra ilay toetra sy fombafombanao !

faly lalandava, ary be fitiavana

tia hantahanta, tsy manadino havana

ka asa re ry aiko

izay anton’izany

ny zavatra antenaiko

indrindra eto an-tany

Dia ny « haharetanao »

tsy hamela hangatsiaka

ilay teny malagasy

izay reharehantsika

 

satria ny talenta, izay voizinao

dia tena hafakely, ka tiavo sy hajao

tsy tongatonga foana

ary tsy zava-poana.

 

 

Hoy i mama

RAKOTO RANARISON Agnes

 

2000

Ny Eja