FITIA MANETRY TENA

Tompo ô,

miangavy raha azo atao,

Aza avelanao aho,

hitady foana ny hotiavina,

na manao fihevi-dravina:

“Tsy tia izay mankahala ahy”,

tsy miaina ara-panahy!.

Fa mba omeo ahy kosa ,

Ilay fitiavanao miavosa!

Omeo fo mitia ny hafa,

ka ny tànako hamafa:

Ireo tarehy izay ikorinan-

dranomasom-pahoriana !

Aza avelanao loatra;

Hitady tombony aho ety,

Fa mba hanome mihoatra:

mahay mizara ny fitia

Amin’ny manodidina ahy,

Ho modely ara-panahy!.

Aza avelanao hiteny,

raha manambony tena irery.

ka tsy hijery ireo mijaly:

Tototra tsiparifary

ilay anjarany eto an-tany.

fa hizara izay mba ahy

sy hamoky ny fanahy;

Izay mitady, dia omena:

Ilay fitia manetry tena

Hitondra izao tontolo izao,

Hanaja sy hanompo Anao

 

(2001)

 

Nivoaka gazety Lakroan' i Madagasikara (sept 2002)

Ny Eja